Në datën 12 tetor 2022, Fiks Fare trajtoi problematikën e familjes Prifti në fshatin Kadipashaj në Lushnje, anëtarët e së cilës ishin lënë rrugëve, megjithëse kishin një kujdestare ligjore që u merrte pensionin dhe KEMP-et. Anëtarët e familjes thanë për Fiksin se nuk e njihnin kujdestaren, e cila ishte nusja e njërit prej djemve. "Nuk e dimë nëse marrim pension. Lajmë, shpëlajmë. Gatuajmë vetë" thanë ata, ndërsa gjendja e shtëpisë ishte skandaloze. E papastruar, me krevate e dyshekë të papastër. Rrobat e trupit po bënin muaj pa larë. Ndërkohë, Fiksi pyeti edhe te Posta në Krutje, të cilët na thanë se 4 anëtarë të familjes marrin pension dhe ndihmë ekonomike. Por, ato ua tërheq Aida Prifti, e cila gjithashtu merr 160 mijë lekë të vjetra si kujdestare. Në total, familja merr rreth 640 mijë lekë të vjetra. Në tetor, kujdestarja tha se do të kujdesej për familjen.