Në redaksinë e Fiks Fare mbërritën 3 denoncime, për një zyrë e cila reklamonte se ofronte viza pune për në Angli. Qytetarët denoncuan se punonjësit e kësaj zyre iu kërkonin deri në 2600 paund për kontratë pune dhe vize 3-vjeçare për në Londër, Mançester dhe Liverpul. Pas këtyre denoncimeve, gazetarët e Fiks Fare shkuan në këtë zyrë, e cila gjendet në qendër të Tiranës. Punonjësja e zyrës jep të gjithë informacionin se “B&M Group” ofron kontrata pune dhe viza 3 vjeçare në bashkëpunim me “B&M Retail Group” në 3 qytete të Anglisë, Londër, Liverpul, dhe Mançester. Sipas punonjësve të zyrës në Tiranë, “kompania angleze ofron kontratën e punës sipas profesionit që aplikanti kërkon”. Më tej ata vijojnë se kompania mëmë angleze të ofron akomodimin për 3 vjet dhe aplikon në Angli për leje qëndrimi. Viza merret brënda 15 ditëve nga aplikimi në ambasadë” pohojnë punonjësit. Ata garantojnë kthimin e parapagesës vetëm në rast se refuzohet viza.