Fiksi investigoi edhe fondet që janë akorduar për rregullimin e shëtitores në të dy anët e lumit. Në vitin 2014, Ministria e Mjedisit njoftoi nisjen e punimeve për projektin e rehabilitimit dhe pyllëzimin e shëtitores "Bregu i Drinit në Lezhë". Një investim prej 30 milionë lekësh të rinj, që synonte rehabilitimin e Drinit në të dy anët e tij, ndërtimin e shëtitores me një gjatësi 2 kilometra, vendosjen e stolave dhe të ndriçimit. "Do ta shndërrojnë shëtitoren nga një zonë të degraduar në një ambient të pastër, të bukur dhe në shërbim të qytetarit. Për gjelbërimin e Shëtitores do të mbillen 1000 fidanë të llojit rrap dhe 2600 fidanë dekorativ me ngjyra të ndryshme" tha ish ministri i Mjedisit, Lefter Koka. Projekti përfundoi, por gjithmonë kishte probleme në trotuare, në lumë apo edhe në "mobilimin" urban. Fiksi bëri një vëzhgim të gjendjes ekzistuese, ku rezulton me pllaka të hequra, pa asnjë stol, siç edhe u premtua. Ndërkohë, ndarëset e trotuarit me lumin kanë qenë të drunjta. Por edhe ato janë degraduar, disa të kalbura. Pjesë - pjesë të hequra, të shqyera.