Një familje u ankua në emisionin “Fiks Fare” se i afërmi i tyre ka ndërruar jetë në Itali, në dhjetor 2022. Kanë bërë dokumentet dhe i kanë dorëzuar në shkurt 2023. Ata kanë shkuar te Ministria e Financave dhe kanë marrë përgjigje se “s’ka lekë”. “Kemi një problem se në dhjetor të vitit 2022 na ka ndërruar jetë mamaja në Itali, në qytetin e Torinos. Dhe kur e sollëm në Shqipëri, e kemi sjellë me shpenzimet tona. Morëm një agjenci funerali italiane. Më vonë këtu në Shqipëri morëm vesh që për personat që ndërrojnë jetë jashtë shtetit, shteti shqiptar paguan një pjesë, kompenson, një pjesë të shpenzimeve, të ardhjes në Shqipëri, nga Italia në Shqipëri” thotë denoncuesi. Ai pohon se është një VKM e vitit 2003 dhe 2004 që kompenson me 70 lekë të rinj për 1 kilometër. “U interesuam, i bëmë të gjitha dokumentet që na u kërkuan, që duheshin, i dorëzuam këto dokumente të gjitha, vajtëm atje pyetëm dhe na thanë që duhet të prisni sepse ka akoma njerëz që kanë ndërruar jetë në maj të vitit 2021 dhe s'i kanë marrë lekët akoma. Problemi është te Ministria e Financave, e nuk ka lekë nuk ka lëvruar fond” thotë denoncuesi.