Disa orë pas lajmërimit të institucioneve, IMT-ja e Bashkisë së Durrësit vjen në terren. Verifikon dokumente dhe pas disa minutash thotë se “do të pezullojmë vendimin për rrethimin”. Fiksi e pyet se përse, thonë se “të dyja palët kanë certifikatë pronësie”. Pra, të dyja palët kanë certifikata! Po si është marrë leja e rrethimit të kësaj prone?! Fiks Fare ka siguruar dokumentin e lëshuar nga Bashkia e Durrësit, leje e cila ka dalë me emrin e firmës Albania Turist Resort. Gazetarët biseduan me administratoren e kësaj kompanie, znj, Ana Shtjefni, për procedurat e ndjekura. Ajo tha se ka kërkuar pezullimin e kësaj leje, pasi nga një letërkëmbim me Kadastrën ka rezultuar se sipërfaqja e rrethuar ishte e z. Bajram Koculi. Madje, znj. Shtjefni tha se “të gjithë volumet e pasurive te Kepi i Rodonit, që përfshijnë edhe rrugën e Pyllin, janë sekuestruar nga SPAK në Kadastër”. Ka dyshime se janë kthyer në kundërshtim me ligjin. Gjithashtu, administratorja e kësaj kompanie pohoi për Fiks Fare se edhe rruga shtetërore është privatizuar para 18 muajsh.