Gjatë verës banorët e fshatit Synej në Kavajë protestuasn me bllokim rruge pasi prej 3-4 vitesh hajdutët kanë bërë kërdinë në shtëpitë e tyre. Ata jetojnë në emigrim dhe banesat e tyre janë vjedhur disa herë. Ata iu drejtuan Fiksit pasi pohuan se policia nuk ka vepruar mbi vjedhjet që u janë bërë. Fiks Fare kërkoi informacion pranë Drejtorisë së Policisë së Durrësit për problemin që ngritën banorët e Synejit. Policia bëri me dije që në fshatin Synej gjatë 8 muajve të parë të vitit 2023 janë regjistruar 21 raste të vjedhjes së banesave. Nga këto, janë zbuluar 11 raste, me 9 autorë të identifikuar, nga të cilët 5 janë arrestuar, 3 janë shpallur në kërkim dhe 1 i mitur është proceduar në gjendje të lirë. Aktualisht në këtë zonë ka patrullime nga strukturat e Komisariatit të Policisë Kavajë, me qëllim parandalimin e vjedhjeve në këtë zonë. Gjithashtu policia sqaron se shumica e banesave në të cilat janë kryer vjedhjet, janë banesa të shtetasve emigrantë dhe konstatimi i vjedhjeve në këto banesa është bërë kur poseduesit e tyre janë kthyer nga vendet ku jetojnë aktualisht, pra disa kohë pasi kanë ndodhur vjedhjet, gjë që e ka bërë të vështirë identifikimin dhe kapjen e autorëve të këtyre ngjarjeve. Ndërkohë që policia vijon veprimet hetimore për kapjen e shtetasve të shpallur në kërkim për këto raste, si dhe identifikimin dhe kapjen e autorëve të tjerë të dyshuar për këto vepra penale.