Fiks fare u interesua pranë Bordi të Kullimit Shkodër, specialisti Selami Bala shpjegon se drejtoria që ai përfaqëson ka vënë në dijeni Drejtorinë e Emergjencave e cila ka parë gërryerjen me shpejtësi që bën Drini dhe ka nxjerrë një fond prej 1,5 mln lekësh të vjetra për një plan projekt emergjent. Firma projektuese që ka fituar tenderin ka bërë para 3 muajsh projektin ku ka dalë më një preventiv dhe tani ka mbetur çështja pezull. "Tani presim financim nga ministria për projektin" përfundon specialisti Bala. Fiksi iu drejtua edhe Prefekturës Shkodër ku prefektja Majlinda Agoni shpjegoi se ishin në dijeni të problemit që ka komunitetit i fshatit Bërdicë e Sipërme. "Menjëherë shkuam dhe e verifikuam situatën që me të vërtetë është shqetësuese, dhe u vumë në kontakt me Drejtorinë Rajonale të Ujrave dhe të Kullimit dhe paraqitëm rastin urgjent. Situata ishte e frikshme edhe drejtoria që në muajin gusht kishte marrë masa paraprake dhe kishin paraqitur një plan projekt për ndërhyrje. Projekti u dorëzua, në muajin tetor pranë Ministrisë së Bujqësisë. Për ta nxitur dhe për ta bërë sa më shpejt dhe të aplikueshëm projekti është dorëzuar dhe në Ministrinë e Brendshme. Jemi në pritje të lëvrimit të fondeve, të aprovimit" shpjegoi prefektja. Reshjet e shumta të shiut që kanë rënë në vendin tonë e kanë bërë edhe më alarmante situatën, ku banorët përveç tokave bujqësore tashmë kanë frikë se lumi mund t'u marrë gjënë e gjallë dhe shtëpitë.