Pas kësaj “errësire”, gazetarët bashkë me një fermer shkuan te Prefekti i Korçës. Në kronikat e mëparshme të Fiksit, ish-prefekti Dhori Spirollari kishte premtuar zgjidhjen e kësaj problematike, teksa do të fliste edhe me Ministrinë e Financave dhe Ekonomisë. Por, edhe pas këtij premtimi, fermerët s’kanë marrë paratë. Gazetarët tentuan që të marrin në intervistë Prefektin e ri, Nertil Jole, por s’ishte në zyrë. Punonjësit e Prefekturës tregojnë një letërkëmbim të gjatë mes Prefekturës së Korçës dhe Ministrisë së Ekonomisë. Letrat kanë filluar që në vitin 2016 e deri në ditët e sotme. Por, asnjë qindarkë s’po jepet. Në një dokument ministria thotë se: “Ka ndjekur me shqetësim dhe në vazhdimësi situatën e vështirë ekonomike-financiare që po kalon ‘Mika Korçë’ ku MFE është aksionere me 37.98 % të aksioneve. MFE ka kërkuar pranë Gjykatës së Korçës fillimin e procedurave të falimentit të shoqërisë. Pas vlerësimit të gjykatës për shpalljen në faliment, kjo e fundit cakton administratorin e falimentit, i cili do të jetë struktura që do të fillojë shitjen e të gjitha asteve të shoqërisë për likuidimin e kreditorëve dhe për rrjedhojë konkludojmë drejt një zgjidhje përfundimtare të kësaj situate. Nuk ka hapësirë ligjore që ortaku shtetëror në minorancë të përshpejtojë procedurën e vendosjes së likuidatorit, pasi kjo çështje është tashmë në gjykatë”. Pra ende asnjë zgjidhje!