Në redaksinë e emisionit Fiks Fare mbërritën një ankesë nga disa punonjës të Policisë së Shtetit, të cilët shoqërojnë efektivë të Frontex të patrullojnë në kufirin mes Shqipërisë dhe Greqisë, për parandalimin e emigrantëve. Këta punonjës deklarojnë se, mes Policisë së Shtetit dhe Frontex ka një marrëveshje që disa efektivë shqiptarë të shoqërojnë grupet e Frontex. Dietat e tyre paguhen nga Frontex. Por, çfarë ka ndodhur?! Frontex i kryen pagesat në fillim të shërbimit. Janë pagesa për ushqim dhe fjetje. Ndërkohë, punonjësit e policisë i marrin në fund të shërbimit. Madje, në dorë! Detyrohen të vijnë te financa në Drejtorinë e Përgjithshme dhe t'i tërheqin kesh te financa. Ndërkohë, këto pagesa vonojnë disa muaj, madje policëve u mbahen edhe 20 %. Pas kësaj ankese, Fiks Fare bisedon me telefon me financieren e Drejtorisë së Përgjithshme të Policisë së Shtetit. Fillimisht, financierja e pranon se këta punonjës kanë disa muaj pa marrë dieta. Pyetjes se, si i marrin pagesat këta efektivë, financierja thotë se "në dorë". Ligji për Policinë e Shtetit, apo edhe për institucionet buxhetore, ndalon çdo pagesë që të bëhet "në dorë". Pagesa duhet të kalojë në Thesarin e Shtetit apo në bankë. Financierja e pranon se Frontex i derdh këtë shumë në llogarinë e Policisë së Shtetit, por më pas pagesat bëhen në financën e saj, me zarfe.