Emisioni Fiks Fare këtë herë udhëtoi drejt fshatit Suku 2 të bashkisë Roskovec ku prej shumë vitesh banorët e këtij fshati kalojnë çdo ditë mbi një urë të sajuar prej tyre e cila përbëhet nga 3 tuba uji të vendosura njëra pas tjetrës dhe disa fletë të holla llamarine të hedhura mbi to. Banorët thonë se këto tubacione në kohën e koperativës shërbenin për vaditje, por tani kryejnë funksionin e një ure duke i shërbyer banorëve si një rrugë e shkurtër për kalim. Ata thonë se kalimi mbi të është shumë i rrezikshëm por edhe pse janë ankuar disa herë në bashki dhe në njësi administrative nuk kanë marrë asnjëherë zgjidhje. Sipas tyre vetëm gjatë fushatës elektorale deputetë të ndryshëm u kanë premtuar se do të gjindet një zgjidhje, por vetëm pasi kanë marrë votat e banorëve nuk është bërë më asgjë. Fëmijët e shkollës 9-vjeçare të fshatit kalojnë çdo ditë mbi këtë urë të sajuar madje ata thonë se një i moshuar ka rënë 2 herë dhe ka thyer këmbën, gjithashtu dhe një fëmijë i fogël është penguar dhe nuk kalon më.