Drejtoria e Shërbimeve Qeveritare ka në organikë 203 persona, të cilët janë në gatishmëri për pushimet, pritjet, përcjelljet e krerëve të shtetit. Kjo drejtori ka nën administrim Pallatin e Brigadave, Pallatin e Kongreseve, 10 vila pushimi dhe Qendrën Rezidenciale në Durrës. Çdo vit, kjo drejtori tenderon miliona euro për restaurime, blerje materiale, ushqime, madje edhe për shërbime luksoze. Fiks Fare hulumtoi dokumentet e tenderëve, ku rezulton se javët e fundit është shpallur fituesi për restaurimin e Vilës Nr.5, në Tiranë. Vlera e këtij tenderi është plot 5 milionë euro. Ndërkohë, e njëjta drejtori ka hapur edhe tenderin “rikonstruksioni i Vilës Nr. 31”, me një fond 1 milionë euro. Por këto s’kanë qenë shpenzimet e vetme. Drejtoria ka bërë edhe disa procedura për blerje “pajisje dhe materiale elektroshtëpiake”, me fond 2.5 milionë lekë. Gjithashtu edhe procedurën e blerjes së detergjenteve, produkteve higjieno-sanitare dhe aksesorë në ndihmë të pastrimit vitin 2023. Fondi i këtij tenderi është 7 milionë lekë. gjithashtu Fiksi zbardhi dhe plot tendera të tjerë për naftë, benzinë, verë e pije alkoolike etj..