Fiks Fare iu drejtua me një kërkesë për informacion Ministrisë së Arsimit dhe Sportit , e cila në përgjigjen e saj renditi disa hapa që ka ndërmarrë në vite për të lehtesuar çantat e nxënësve. Në këtë përgjigje thuhet se "Hapi i parë , është praktika “3 në 6” , sipas të cilës nëpër klasa realizohen dy orë të së njëjtës lëndë duke reduktuar numrin e librave që nxënësi merr në çantë". Gjithashtu, për të ulur peshën e çantës apo numrin e librave në çantë, Ministria e Arsimit këtë vit rriti numrin e shkollave ku praktikohet nisma “Bëjmë Detyrat e Shtëpisë”, duke i bërë nxënësit që detyrat t’i bëjnë në shkollë dhe të mos transportojnë libra për në shtëpi. "Këtë vit janë shtuar edhe 150 shkolla në këtë nismë, duke e çuar numrin total në 300' shkruhet në përgjigjen e ministrisë. Madje kanë fillaur edhe bisedimet mes Ministrisë së Arsimit dhe shtëpive botuese që këto të fundit të rishikojnë parametrat e letrës së përdorur për botimet shkollore, për të bërë libra më të lehtë. Për disa nga librat, po diskutohet botimi i tyre në dy pjesë. Edhe pse kjo ministri ka fillaur tashme zbatimin e këtyre masave, siç u pa në vëzhgimin e Fiks Fare në shkollat e kryeqytetit, problemi nuk është zgjidhur. Çantat e nxënësve të arsimit fillor variojnë nga 5 kg-14 kg, ndërkohë që specialsitët thonë se nuk duhet të kalojnë 10% peshës së tyre trupore.