Në Bashkinë Maliq, prej vitesh mungojnë mjekët në qendrat shëndetësore. Emisioni "Fiks fare" e ka ngritur këtë shqetësim të banorëve të Bashkisë Maliq të cilët vuajnë për mjek disa herë, por edhe pas një viti ende është e njëjta situatë. Madje ai që e ngre më fortë shqetësimin e banorëve të Maliqit është kryetari i bashkisë zoti Gëzim Topçiu ."Kjo situatë është prej 3-4 vitesh dhe nuk ka asnjë përmirësim. Jemi ankuar dhe te Drejtoria Rajonale e Operatorit të Kujdesit Shëndetësor në Elbasan, në Njësinë Vendore të Kujdesit Shëndetësor Korçë, në Ministrinë Shëndetësisë dhe nuk është bërë asgjë. Kemi 8 mjekë dhe na duhet edhe 8 të tjerë" shprehet kryetari. Ai u tregoi gazetarëve shkresat zyrtare që bashkia që ai drejton u ka nisur instancave përgjegjëse në lidhje me mungesën e bluzave të bardha, dhe nga këto shkresa gjendja duket alarmante.