Pas denoncimit të Fiks Fare mbi mjeken e cila lëshonte certifikata vaksinimi kundrejt ryshfetit pa i kryer vaksinën qytetarit, Ministria e Shëndetësisë reagoi duke marrë masën e menjëhershme të shkarkimit nga detyra të mjekes me inicialet E. N. Në reagimin e saj ministria e konsideron veprimin e mjekes një akt kriminal, shkelje të rëndë në dëm të shëndetit të qytetarëve dhe shëndetit publik të popullatës në situatën e pandemisë. Gjithashtu Ministria e Shëndetësisë shkruan se do t’i kërkojë Urdhrit të Mjekut, heqjen e licensës së ushtrimit të profesionit për mjeken në fjalë. Masë për lirimin nga detyra është marrë edhe për drejtorin e Qendrës Shëndetësore Gradisht . Ministria e Shëndetësisë dhe Mbrojtjes Sociale falënderon emisionin investigativ "Fiks Fare" për denoncimin publik të këtij rasti korrupsioni dhe abuzimi me detyrën dhe shëndetin e qytetarëve.