Fiks Fare kërkoi në Këshillin Bashkiak të Matit dokumentet për këtë HEC. Këshilli na vuri në dispozicion të gjithë dosjen, ku midis dokumenteve është edhe një vendim i datës 19 korrik 2018. Në atë kohë, ky Këshill vendosi "të miratojë dhënien në përdorim dhe lejimin e rikonstruksionit të kanalit vaditës Shutrrej-Urakë, subjektit 'Ateani Energy'". Dokumenti është firmosur nga zv.kryetari dhe nga sekretarja. Sipas Këshillit, në atë kohë, kryetar i Këshilli Bashkiak ka qenë z. Agim Hysa. Ndërkohë, 6 ditë para këtij vendimi, firma "Ateani Energy" i kishte kërkuar Këshillit miratimin e kësaj kërkesë. Dhe, për çudi, në fund të kërkesës ishte edhe emri i administratorit të këtij subjekti, z.Agim Hysa. Pra, Këshilli Bashkiak i dha leje firmës së kryetarit të Këshillit për këtë pronë publike! "Ai i dha leje vetes. Përdori anëtarët e këshillit" pohojnë banorët. Sipas dokumenteve nga Qendra Kombëtare e Biznesit, në korrik 2018, pronar dhe administrator i firmës "Ateani Energy" ka qenë z.Agim Hysa. Vendimi i Këshillit u miratua edhe nga ish-kryetari i Bashkisë Mat, z.Nezir Rizvani.