Emisioni Fiks Fare solli rastin e një institucioni shtetëror që paracakton fituesin për tendera. Bëhet fjalë për një tender për riparim automjetesh të dhënë para ca kohe e në mënyrë të paracaktuar nga ana e Agjencisë Rajonale të Mjedisit , Fier- Vlorë -Gjirokastër. Ky institucion e ka marrë automjetin në gjëndje të amortizuar nga drejtoria e përgjithshme e mjedisit për ta riparuar, por pa u bërë tenderi është përcaktuar fituesi. Bashkëpunëtorët e Fiksit shkojnë tek servisi në të cilin ky automjet është riparuar. Punëtorët e këtij servisi duke e ditur se për kë mjet bëhej fjalë, konfirmuan se është riparuar para 3 muajsh në të njëjtin servis. Por problemi qëndron tek tenderi i dhënë për riparimin automjetit i cili është hapur vetëm para një muaji, ndërkohë që mjeti ka 3 muaj që është riparuar. Pra, është përcaktuar fituesi, në këtë rast servisi, që ka riparuar mjetin.