Dy familje me 10 anëtarë në lagjen Çarje në fshatin Mamël të Elbasanit rrezikojnë shtëpitë nga rrëshqitja e dheut. Para dhjetë ditësh një masiv i madh shkëmbor rrëshqiti nga mali duke rrezikuar një familje dhe forcat xheniere të Ministrisë së Mbrojtjes shkuan bën shpërthimin e gurëve që rrezikon banorët. Por fatkeqësia natyrore nuk përfundoi këtu, para katër ditësh një masiv i madh dheu rrëshqiti dhe po përparon drejt shtëpive, më të rrezikuara janë dy prej tyre. Banorët kërkojnë ndihmë që shteti t'i ndihmojë të heqin sasinë e madhe te dheut, pasi jo vetëm që u rrezikon shtëpitë, por u është bllokuar edhe rruga e fshatit. Fiksi u interesua në Drejtorinë e Emergjencave Civile në Bashkinë e Elbasanit të cilën pohuan se kishin nisur një grup verifikimi për të bërë vlerësimin e situatës e më pas do të procedohej me dëmshpërblimet për familjet e prekura.