Pak ditë më parë, në numrin e kontaktit të emisionit Fiks Fare, 0693333313 erdhën disa video ku tre fëmijë të moshës 15, 12 dhe 11 vjeç, tregonin gjendjen e mjerueshme të banesës ku jetonin. Ata qanin, dhe ankoheshin se nëna e tyre i keqtrajtonte, pasi vuante nga probleme të shëndetit mendor. Në njërën nga videot, nëna duket se godet njërën nga vajzat, ndërsa në një tjetër nëna, urdhëron babain të mos e prekë miellin për të bërë petulla për fëmijët, pasi në të kundërt do të thërrasë policinë. Të alarmuar nga kjo gjendje, gazetarët e Fiksit u nisën menjëherë për ta ndjekur si rast. Në banesën ku jeton familja, kishte vetëm dy dhoma, ndërsa energjinë elektrike e merrnin nga komshinjtë. Tualeti ishte jashtë banesës pa derë, dhe nuk kishin as ujë të ngrohtë për t'u larë. Ushqimi mungonte dhe fëmijët tregonin që nëna e tyre e cila vuante nga probleme të shëndetit mendor i rrihte, i linte pa ngrënë dhe i nxirrte jashtë nga banesa në shi e në të ftohtë.