Andrea Himaj denoncoi në Fiks Fare se nuk po mundte të tërhiqte nga shteti fqinj trupin e motrës së tij të ndjerë. Ai tha se motra e tij, që jetonte e vetme në Selanik kishte humbur jetën në një aksident më datë 18 maj. Njoftimin e kishte marr nga inspektori i zonës në Dimal, i cili i kishte thënë që motra e tij ishte përfshirë në një aksident dhe ka ndërruar jetë. Sipas tij njoftimi kishte ardhur nga zv/drejtori i Policisë së Beratit. Pasi mori njoftimin nisi dhe kalvari i dhimbshëm i tij për tërheqjen e trupit të së motrës nga spitali grek dhe sjellja e tij në atdhe. Ambasada Greke për shkak të pandemisë i kërkonte certifikatën e vdekjes që t'i jepte leje kalimi në kufi, ndërsa spitali i thoshte që duhet ta tërhiqte personalisht. Në këto kushte ai njofton Konsullatën në Selanik dhe vetëm më datë 25 arrin të plotësojë të gjitha dokumentet e kërkuara nga konsullata për verifikim. Por pavarësisht kësaj akoma nuk kishte marrë një përgjigje ndaj u ankua në Fiks Fare.