Në shkurt të vitit 2019, Fiks Fare, vëzhgoi disa ura në të gjithë Shqipërinë, ku një nder to ishte Ura e Zogut, e ndërtuar rreth 90 vite më parë. Bashkë me inxhinierin Xhevair Ngjeqari, emisioni investigativ tregoi se Ura ishte lënë në mëshirë të fatit për një periudhë të gjatë, çka rrezikonte shembjen në rast të mos ndërhyrjes. Dhe, plot 2 vite pas këtij denoncimi, Ura e Zogut, mbi lumin Mat, ka filluar të shkatërrohet. Disa këmbë të saj po shkatërrohen dita-ditës, teksa asnjë prej institucioneve nuk kanë ndërhyrë për rregullimin e kësaj situate. Gazetarët e Fiks Fare vëzhguan nga afër urën apo edhe faktuan dëmtimet e saj. Një pjesë po fundosej dita-ditës dhe vetëm një mrekulli mund ta shpëtojë këtë vepër. Megjithëse prej 20 vitesh duhej të mbrohej nga shteti, sërish nuk është vënë asnjë dorë nga institucionet qendrore dhe lokale. "Pronari" i saj, Ministria e Kulturës, nuk ka bërë asnjë rehabilitim, ose të paktën konservimin e saj. Të gjitha dëmtimet u faktuan në denoncimin e Fiks Fare në vitin 2019, por problematika e ngritur, apo edhe apeli i inxhinierit Xhevair Ngjeqari, ranë në vesh të shurdhër. Askush nuk veproi! Inxhinieri tha në atë kohë se nuk ka një urë të ngjashme në Europë dhe ajo duhej të kishte një mbrojtje të veçantë. Mund të bëhej një projekt për rivitalizimin e saj, funksionimin si një pikë turistike. Nëse urat në të gjithë Europën janë qindra mijëra vjeçare, në Shqipëri, edhe ato pak trashëgimi, po shkatërrohen. Dhe, më e keqja, askush nuk vepron.