Bashkë me Hajredinin, gazetarët e Fiks Fare shkojnë në Bashkinë e Tropojës. Muhamet Kurçana, përgjegjës i Zyrës Bujqësore dhe topograf në këtë bashki, thotë se "qytetari Hajredin, ka të certifikuar pasurinë e llojit arë me sipërfaqe 3370 metër katrorë". Më tej pohon se kjo pasuri ka dalë nga hartat e ASIG-ut që kanë në sistem. "Sipërfaqja ka ardhur nga hartat që janë arshivuar nga matjet e topografëve të qytetit. Këto harta kanë gabime. Në të vërtetë kjo sipërfaqe nuk i plotëson metrat. Këto hartat kanë dalë nga ndarja e pronave me ligjin 7501. Por, nuk përputhet dokumenti nga ato që janë në terren, s’është bërë mirë harta nga topografët. Kjo AMTP është regjistruar në emër të z.Hajredin, kemi nxjerre vërtetim që ia kemi thënë qytetarit" thotë topografi, duke shtuar se "brenda kësaj certifikate janë edhe 800 m2 të qytetarit Sali Selimajt. Këtu del që kjo certifikatë s’është e rregullt. Për të njëjtën pasuri janë dy pronarë. Duhen korrigjuar". Por, krahas problemit të kësaj familje, topografi zbulon se e gjithë zona e Valbonës ka probleme të mëdha me regjistrimin e pronave, duke i hapur "rrugën" personave të tjerë të bëjnë tjetërsime dhe mbivendosje pronash.