Fiks Fare u interesua edhe në Bashkinë Kurbin ku u informuan se janë bërë tendera të ndryshëm për rikonstruksionin e pallateve në Milot të cilat janë ndarë me faza. Faza e parë, ku ishte edhe pallati i qytetarit Nikoll Palaj, është bërë vetëm fasada dhe asnjë gjë tjetër. As tarraca dhe as ambientet e përbashkëta. Sipas bashkisë, shkak janë bërë fondet, pasi kanë dashur që të bëjnë sa më shumë pallate. Në fazën e dytë janë investuar të tjera miliona euro dhe janë bërë punime në ambiente të përbashkëta, shkallë dhe tarracë. Pra, një ndërhyrje më e thellë, pavarësisht se në dokumentet e tenderëve të të dyja fazave shkruhej "në ambiente të përbashkëta". Në fazën e parë ambient i përbashkët ishte fasada, ndërkohë në fazën e dytë ambient i përbashkët ishte fasada, tarraca, sistemimi i ujërave, shkallët, suvaja etj . Pra, disa pallate u trajtuan të njerkës dhe disa të tjerë të nënës. Fiks Fare ka siguruar disa dokumente të vendimeve të qeverisë, e cila ka akorduar 830 milionë lekë për restaurimin e pallateve për të dyja fazat për Bashkinë e Kurbinit. 360 milionë lekë të rinj u përdorën për fazën parë dhe 360 milion lekë të rinj u përdorën për fazën e dytë. Në fazën e parë u bë vetëm suvaja, ndërkohë në fazën e dytë u bënë edhe ambientet e përbashkëta. Por punimet e të dyja fazave janë kundërshtuar nga banorët, pasi nuk kanë patur cilësi.