Neglizhenca dhe indiferenca e Zyrës Arsimore dhe e drejtorit të shkollës lë fëmijën me probleme të spektrit autik pa mësues ndihmës. Fëmija kafshon dhe dhunon bashkëmoshatarët. Bëhet fjalë për shkollën 9 vjeçare "Abdyl Bajraktari" në Koplik, ku prindëri i dy vajzave në klasë të parë ankohet se fëmijët i vijnë me shenja kafshimi nëpër duar nga shkolla. Kafshimet kryhen nga një tjetër bashkëmoshatar me probleme të spektrit autik, që e bën edhe me fëmijët e tjerë të klasës. Prindi shpjegon për Fiksin se ka vënë në dijeni drejtorin e shkollës dhe është larguar me fjalë për zgjidhjen e situatës, por në të vërtet nuk ka ndodh një gjë e tillë. Prindi kërkon që në atë klasë të çohet një mësuese ndihmëse apo ndonjë psikolog që të kujdeset për fëmijën që shfaq shenja dhune. Fiksi u interesua edhe në drejtorinë e kësaj shkolle, ku drejtori Shaban Duka tha për Fiksin se problemi është konstatuar nga psikologia nga nëntori i viti 2023 dhe ka kërkuar në ZVA mësuese ndihmëse. Si përgjigje i kanë thënë që nuk ka dhe duhet ta mbulojnë dhe menaxhojë situatën me mësueset që ka. Fiks Fare u interesua edhe në Zyrën Vendore Arsimore Malësi e Madhe ku specialisti z. Faik Semanaj shprehet se janë vënë në dijeni të rastit nga drejtori i shkollës, z. Duka. Specialisti Semanaj i premton Fiks Fare se problemi do marrë zgjidhje të menjëherëshme. Dhe ashtu ndodhi , ditën e nesërme ZVA çoi një mësuese ndihmëse.