Vetëm një javë pas ekzekutimit të Ardian Nikulajt në biznesin e tij në Shëngjin, policia njoftoi se gjashtë persona janë në kërkim ndërkombëtar për vrasjen. Ekzekutori është identifikuar portugezi Ruben Saraiva, ndërsa bashkëpunëtorët në këtë vrasje janë Edmond Haxhia, shtetas shqiptaro-britanik; Harry Simson, shtetas britanik, Harriet Bridgeman, shtetase britanike; Thomas Mithan, shtetas britanik dhe Steven Hunt shtetas britanik. Si shkak për ekzekutimin dyshohet gjakmarrja, sipas uniformave blu. Elton dhe Klodian Lestakaj, të cilët jetojnë në Angli, ishin në gjak me Nikulajn. Edmond Haxhia është djali i dajës së tyre dhe dyshohet se ishte ai që porositi vrasjen. Ruben Saraiva, autori portugez i vrasjes së biznesmenit Ardian Nikulaj në Shëngjin, i apasionur pas motorëve siç tregohet në rrjetet sociale, motorin kësaj radhe e përdori për të ekzekutuar Nikulajn. Autori mban një maskë, skafandër, jelek fosforeshent dhe i kamufluar me veshje të trasha, pasi kryen vrasjen me pistoletë në një distancë shumë të afërt dhe i vetëm u largua qetësisht me motor nga vendngjarja. Zbatimi i planit të ekzekutimit nisi para 3 muajsh. Fillimisht në Shqipëri erdhi Haxhia, e më pas Saraiva që qëndroi dy muaj në Shkodër. Gjithashtu erdhën dhe britanikët e tjerë që të fshehur si turistë kryenin misione vëzhgimi. Asnjë prej personave nuk është vënë nën pranga, ndërkohë që partnerët europianë të policisë shqiptare duhet të gjejnë dhe arrestojnë personat e përfshirë në vrasjen e Nikulajt. (Ardi Pulaj)