Prej dy vitesh dy shkolla në Sauk Tiranë janë kthyer në burim aksidentesh për nxënësit e tyre, pasi nuk kanë oborr. Nxënësit nga shkollat dalin direkt në rrugë. Në Fiks u ankuan prindërit e nxënësve të shkollës "Mustafa Greblleshi" dhe "Sabdër Prosi" në Sauk. Problemi i tyre ishte se shkollat ku fëmijët e tyre mësojnë nuk kanë oborr, duke bërë që fëmijët e tyre të jenë të pasigurtë. Nuk ka as roje shkolle pasi nuk ka oborr. Fiksi pa nga afër ambientet e të dy shkollave , ku në atë 9- vjeçare "Mustafa Greblleshi" pa që fëmijët e klasës së dytë e bënin orën e fiskulturës në rrugë, aty ku lëviznin lirshëm edhe makinat. Ajo që ishte më shqetësuese është se fëmijët nuk shoqëroheshin nga asnjë mësues. Të pyetur nga Fiksi fëmijët pohuan se mësuesen e kishin brenda duke pirë kafe. Ndërsa roje nuk kishin pasi derën ua hapte pastruesja e shkollës.