Në Shqipëri, politika prej vitesh shihet si një rrugë që të çon drejt luksit. Politikanë me dhjetëra pasuri të luajtshme dhe të paluajtshme, vila, toka, llogari bankare dhe makina luksoze janë bërë pjesë e një realiteti që publiku e njeh, por që rrallëherë është hetuar seriozisht. Edhe kur pasuritë deklarohen, lëvizja e tyre ndër vite dhe burimi real i të ardhurave pothuajse nuk vihet kurrë në pikëpyetje. Kuvendi i Shqipërisë, me 140 deputetë, është sot një përzierje pushteti dhe kapitali. Dhjetëra prej tyre vijnë nga biznesi, nga prona të trashëguara apo nga një jetë e konsoliduar ekonomikisht. Në këtë realitet, karrigia e deputetit shpesh nuk shihet si përgjegjësi publike, por si simbol statusi, si një trofe që vulos suksesin personal dhe forcon ndikimin shoqëror.