Shqipëria i ofron botës diversitetin dhe tolerancën fetare. E veçanta e këtij diversiteti fetar janë bektashinjtë, të cilët qendrën botërore e kanë në Tiranë. Studiues të huaj na lanë pas vepra të mrekullueshme mbi njohuritë dhe dijen që duhet të kemi për këtë urdhër fetar. Një prej tyre është studiuesi i talentuar i botës shqiptare, Robert Elsi i cili shkroi një vepër monumentale me titullin “Bektashinjtë shqiptarë”. Vlerësuar si një “propozim” i nevojshëm mbi kulturën e të shkruarit, libri nuk lidhet vetëm me kulturën dhe kultin e një besimi të caktuar. Albanologu i njohur na ofron dijen e duhur se bektashinjtë ishin ata që u vunë me shumë përkushtim në ballë të luftës për pavarësi kombëtare të popullit shqiptar. Bektashinjtë shqiptarë në vite, kanë kërkuar t’u njihet përfaqësimi ndërkombëtar i Kryegjyshatës Botërore në Tiranë.