Banorë të fshatit Ujë në Mirditë denoncojnë një problem serioz që prej vitesh po u shkatërron pronat dhe po u rrezikon jetën. Ata akuzojnë kryeplakun e fshatit se lë pa kontroll bagëtitë e tij – derra, lopë, dele dhe dema – të cilat futen lirshëm në arat, vreshtat dhe oborret e banorëve. Pavarësisht ankesave të shumta në bashki, polici dhe prokurori, askush nuk ka marrë masa konkrete. Prokuroria e Lezhës ka vendosur mosfillimin e procedimit penal, duke argumentuar se dëmi nuk kalon vlerën 1 milion lekë. I përballur me banorët, kryeplaku mohon akuzat dhe deklaron se në fshat “veprohet sipas ligjit të fshatit”, duke vënë në pikëpyetje zbatimin e ligjit të shtetit. Banorët kërkojnë ndërhyrje urgjente, drejtësi dhe mbrojtje, përpara se situata të përshkallëzohet në pasoja edhe më të rënda.