Blutë e Tiranës kanë arritur të vënë në pranga një nga bashkëpunëtorët e Eduart Lamajt, për vrasjen e dyfishtë që ndodhi në 30 maj në Laç. Ilir Xhepaj, i njohur ndryshe si Ilir Lika, 33 vjeç, u arrestua mesnatën e së shtunës në Tiranë, pas disa ditë ndjekje që i ishte bërë nga policia, i konsideruar si autori i dytë i kësaj ngjarjeje dhe me rrezikshmëri të lartë shoqërore. 33 vjeçari Xhepaj, ishte në kërkim edhe për një tjetër ngjarje, pasi vetëm 15 ditë përpara se ai të merrte pjesë në vrasjen e Bujar Likës dhe Paulin Gjergjit, ai kishte plagosur me armë në Laç, shtetasin Zef Marku. Për këtë ngjarje, gjykata e Kurbinit ka dhënë masën e sigurisë arrest në Burg, duke e ngarkuar me veprat penale, vrasje me dashje e mbetur në tentativë dhe armëmbatje pa leje. Ilir Xhepaj, do të përballet me drejtësinë edhe me një akuzë të tretë, vrasje me dashje e kryer në bashkëpunim. Në kërkim policor janë edhe dy persona të tjerë, bashkëpunëtorë në vrasjen e dyfishtë, Klaudio Pepkola dhe Oltion Vlashi. Ndërkaq, në këtë video të siguruar nga Top Channel, shihet Eduart Lamaj, teksa i veshur me tuta dhe mushama ku shkruhet Policia, hyn në hotelin ku po qëndronin Bujar Lika dhe Paulin Gjergji.