Entuziazmi në Angli ka arritur kulmin pas fitores 2-1 ndaj Norvegjisë në çerekfinalen e Kupës së Botës 2026, ku Jude Bellingham ishte heroi i mbrëmjes me dy gola.
Mes atmosferës së zjarrtë është bashkuar edhe një nga ikonat më të mëdha të muzikës britanike, Liam Gallagher. Frontmeni i Oasis publikoi një mesazh në rrjetin social X, duke ndezur edhe më shumë shpresat e tifozëve anglezë.
“Këtë Botëror do ta fitojmë ne. Nuk e di si dhe nuk më intereson. Për respekt të gjithë këtyre lojtarëve dhe trajnerit, duhet ta bëni realitet”, shkroi Gallagher, duke e mbyllur postimin me referencën e tij të zakonshme për hitin legjendar “Wonderwall”.
Por surpriza nuk mbaroi me kaq. Këngëtari deklaroi se është gati të interpretojë live “Wonderwall” në finalen e Kupës së Botës FIFA 2026 nëse Anglia arrin të kualifikohet. Kënga është shndërruar tashmë në një himn jozyrtar të “Tre Luanëve” gjatë këtij Botërori, duke u kënduar nga mijëra tifozë në stadiume dhe festa.
Tashmë Anglinë e ndan vetëm një fitore nga finalja e parë e Kupës së Botës që nga triumfi historik i vitit 1966. Më 15 korrik, në Atlanta, skuadra e Gareth Southgate do të përballet me Argjentinën në gjysmëfinale, ndërsa në rast suksesi do të sigurojë biletën për finalen e madhe të 19 korrikut në New York.
Nëse “Tre Luanët” arrijnë misionin, tifozët anglezë mund të festojnë jo vetëm një finale historike, por edhe një performancë spektakolare të Liam Gallagher me “Wonderwall”, këngën që është bërë simbol i ëndrrës angleze në Botërorin 2026.
Top Channel
