Fitorja 3-1 e Argjentinës ndaj Zvicrës në çerekfinalen e Kupës së Botës është shoqëruar me polemika të mëdha, ku në qendër të vëmendjes ka qenë kartoni i kuq i Breel Embolos.
Sulmuesi zviceran u përjashtua nga loja rreth 20 minuta para fundit të kohës së rregullt, pasi VAR ndërhyri për të korrigjuar një vendim të arbitrit João Pinheiro. Fillimisht, arbitri ndëshkoi me karton të verdhë Leandro Paredes, por pas rishikimit të pamjeve vendosi t’ia anulonte kartonin argjentinasit dhe t’ia jepte Embolos për simulim. Duke qenë se ishte kartoni i dytë i verdhë për sulmuesin e Zvicrës, ai u përjashtua nga ndeshja.
Largimi i Embolos ndikoi ndjeshëm në lojën e Zvicrës, e cila mbeti pa pikën kryesore të referimit në sulm dhe u detyrua të mbrohej deri në fund. Në kohën shtesë, Argjentina shënoi dy herë me Julián Álvarez dhe Lautaro Martínez, duke siguruar kualifikimin në gjysmëfinale.
Vendimi i arbitrit ka shkaktuar debat të madh mes analistëve dhe tifozëve.
Gazetari Ben Jacobs argumentoi se rregulli i ri për “identitetin e gabuar” krijon një precedent të rrezikshëm, ndërsa Tom Bogert e cilësoi situatën si “çmenduri”, duke kritikuar ndërhyrjen e VAR-it.
Edhe ekspertja e arbitrimit Christina Unkel u shpreh se futbolli po hyn në një fazë ku VAR po “riarbitron” ndeshjet, duke vënë në diskutim rolin e teknologjisë.
Nga ana tjetër, pati edhe zëra që mbështetën vendimin e arbitrit. Ish-futbollisti amerikan Stu Holden deklaroi se Embolo simuloi me qëllim që të ndëshkohej një kundërshtar dhe se kartoni i verdhë ishte plotësisht i justifikuar.
Ndërkohë, disa tifozë vunë në dukje se arbitri nuk përdori të njëjtin standard për lojtarët e Argjentinës, duke pretenduar se edhe ata duhej të ishin ndëshkuar më shpesh gjatë pjesës së parë.
Pavarësisht polemikave, vendimi i arbitrit rezultoi vendimtar për fatin e takimit. Me një lojtar më pak, Zvicra nuk arriti t’i rezistonte presionit të Argjentinës, e cila siguroi biletën për në gjysmëfinalen e Kupës së Botës.
Top Channel
