Phoebe Gates, vajza 22-vjeçare e bashkëthemeluesit të Microsoft-it, Bill Gates, zbulon pa dashje një detaj personal dhe mjekësor për të atin.
Gjatë një podkasti ku studentja e Universitetit Stanford diskutonte për përvojën e të sjellurit një të dashur në shtëpi kur je vajza e njërit prej njerëzve më të njohur – dhe, sipas saj, më të çuditshëm – në botë, Phoebe përmendi rastësisht një informacion të ndjeshëm në lidhje me babain e saj.
“Babai im është mjaft i çuditshëm në aspektin shoqëror. ‘E di, ai ka sindromën Asperger’, tha ajo, ndoshta pa e menduar mirë pasojën e fjalëve të saj.
Ky koment, i papritur dhe mjaft personal, shkaktoi reagime të menjëhershme, pasi Bill Gates vetë nuk e ka konfirmuar ndonjëherë publikisht një diagnozë të tillë.
Megjithatë, ai ka deklaruar më parë se e identifikon veten me disa tipare të spektrit të autizmit. Zbulimi i bërë për herë të parë nga një anëtar i familjes së tij përmend drejtpërdrejt një gjendje specifike të lidhur me shëndetin mendor apo neurologjik të tij.
Pas këtij komenti, rrjetet sociale u përfshinë nga diskutime dhe komente të shumta, ndërsa videoja u bë virale. Shumë u pyetën nëse ajo kishte zbuluar pa dashje një aspekt privat të historisë mjekësore të babait të saj.
Deri tani, miliarderi 69-vjeçar dhe filantropi i njohur nuk ka dhënë ndonjë reagim publik për këtë deklaratë të vajzës së tij.
Megjithatë, në kujtimet e tij të publikuara në vitin 2023, me titullin Source Code, Gates shkruan se nëse do të rritej sot, ka shumë gjasa që do të diagnostikohej me një çrregullim të spektrit të autizmit.
Në libër, ai tregon për vështirësitë që kishte në ndërveprimet shoqërore si fëmijë dhe për përqendrimin intensiv në interesa specifike – karakteristika tipike të sindromës Asperger, e cila sot konsiderohet pjesë e spektrit të autizmit.
“Isha një fëmijë shumë i përqendruar. Humbja krejtësisht në atë që po bëja, aq sa harroja edhe të haja,” shkroi Gates. “Ndoshta sot do të më kishin diagnostikuar, dhe kjo nuk është diçka e keqe – është pjesë e asaj që jam.”
Në një intervistë të dhënë për Axios në shkurt, Gates foli më tej për mënyrën se si ndjehej ndryshe nga bashkëmoshatarët gjatë fëmijërisë.
“Gjithmonë e kam ditur se isha ndryshe, për nga niveli dhe intensiteti i energjisë sime, për faktin që shpesh izolohesha dhe thjesht studioja gjëra,” tha ai.
Ai shtoi se kjo ndjesi e të qenit ndryshe mund të jetë e vështirë për një fëmijë, sidomos kur aftësitë shoqërore nuk përputhen me normat dhe kur të tjerët reagojnë ndryshe ndaj teje.
“Prindërit e mi, ndoshta pa dashje, sepse në atë kohë nuk kishte diagnozë, më ndihmuan shumë me mënyrën se si ma shpjeguan botën dhe më shtynë të përfshihesha shoqërisht,” përfundoi ai.
Top Channel
