Presley Gerber dyshohet se merrte ketaminë me recetë nga mjeku, pavarësisht betejës me varësinë/ Zbardhen detaje të reja para vdekjes së tij

Djali 27-vjeçar i modeles Cindy Crawford dhe biznesmenit Rande Gerber vdiq të dielën, më 20 shtator, në një qendër rehabilitimi në Los Angeles, një ditë pasi ishte shtruar në spital.

Sipas TMZ, njerëz të afërt me Presley Gerber kanë deklaruar se ai kishte një “problem sistemik” me ketaminën. Të njëjtat burime thanë se të afërmit e tij janë të zemëruar pasi mjeku dyshohet se vazhdoi t’ia përshkruante substancën, pavarësisht problemeve që ai kishte me të.

Ata kanë shprehur bindjen se mjeku duhet të përballet me pasoja ligjore, ndërsa deri më tani nuk është bërë e ditur nëse ndaj tij ka nisur ndonjë procedurë zyrtare.

Burimet thanë gjithashtu se Presley kishte folur me miq të ngushtë për problemet e tij me ketaminën para vdekjes. Megjithatë, ende nuk dihet se çfarë substancash kishte në organizmin e tij në momentin e vdekjes.

Autopsia ka përfunduar, por shkaku zyrtar i vdekjes ende nuk është përcaktuar. Sipas një telefonate në 911 të publikuar nga Page Six, Gerber kishte pësuar arrest kardiak. Autoritetet po vijojnë hetimet për rrethanat e vdekjes së tij.

Vdekja e Presley Gerber ndodhi vetëm një ditë pasi ai ishte pranuar në një qendër rehabilitimi në Los Angeles. Pas lajmit, familja e tij kërkoi privatësi në këtë periudhë të vështirë.

Presley kishte luftuar prej vitesh me abuzimin me substancat dhe, sipas raportimeve, ishte pranuar në qendrën e rehabilitimit pasi kishte kuptuar se kishte nevojë për ndihmë.

Modeli, i cili ndoqi gjurmët e nënës së tij në industrinë e modës që në moshën 15-vjeçare, kishte folur publikisht edhe për vështirësitë personale, problemet me vetëvlerësimin dhe abuzimin me substancat.

Në muajt dhe vitet e fundit, ai kishte ndarë publikisht përvojën e tij në përpjekje për t’u përballur me këto probleme dhe për të kërkuar ndihmë.

Top Channel