“Shqipëria, vend mesdhetar”/ Gazetari Yoeri Albrecht në “Top Story”: Pse e quani veten Ballkan Perëndimor? Nuk jeni ish-Jugosllavi

Ai renditi shumë gjëra që i pëlqejnë nga Shqipëria, ndërsa shprehu mendimin se nuk duhet ta shohim veten si pjesë të Ballkanit Perëndimor. Është shumë e qartë që Shqipëria është një vend mesdhetar, një vend në Adriatik. Nuk ka shumë lidhje me ish-Jugosllavinë dhe nuk ka shumë lidhje as me të gjithë rajonin e Ballkanit Perëndimor, tha ai.

Duma: Shqiptarët dhe shqiptarët në Kosovë janë ndër popujt më pro-amerikanë në botë, nëse shohim të dhënat. Dhe së dyti, nëse SHBA ka bërë ndonjë investim të rëndësishëm gjatë këtyre 30 viteve në Ballkan, edhe pse të vogla, janë ndoshta më të rëndësishmet politikisht për SHBA-të në rajon. Janë vendet që duhet të mbrojnë dhe të ruhen si një pikë strategjike me flamurin amerikan. Çfarë përshtypjeje patët nga Shqipëria?

Albrecht: Jam shumë, shumë i impresionuar nga Shqipëria, për rritjen ekonomike, për atmosferën, për ushqimin, për klimën, për bukurinë e peizazhit. Ju keni pyje me gjethe të gjera kaq në jug, gjë që është e mrekullueshme për t’u parë.

Duma: E keni parë këtë?

Albrecht: Po, është vërtet shumë e bukur. Dhe diçka tjetër më ka bërë përshtypje. Pyes veten pse ne në Evropë, por edhe ju në Shqipëri, shpesh e shihni veten si pjesë e “Ballkanit Perëndimor”. Unë nuk e kuptoj vërtet këtë koncept.

Është shumë e qartë që Shqipëria është një vend mesdhetar, një vend në Adriatik. Nuk ka shumë lidhje me ish-Jugosllavinë. Dhe nuk ka shumë lidhje as me të gjithë rajonin e Ballkanit Perëndimor. Sigurisht, ka vende fqinje, dhe sigurisht që ka lidhje me to, absolutisht. Por Shqipëria i ngjan shumë më tepër Italisë së Jugut. Dhe kjo nuk është aspak e çuditshme, sepse është përballë Italisë së Jugut dhe është në Adriatik.

Dhe nëse e shikoni historinë, unë jam historian dhe jam veçanërisht i interesuar për historinë e Venedikut dhe Republikës së Venedikut, nëse shikoni prosperitetin e Adriatikut në shekujt XIII, XIV dhe XV, nuk e kuptoj pse flasim për Bullgarinë dhe Maqedoninë si krahasim, në vend që të flasim për Puljan, Kalabrinë, Romën, Venecian dhe bregdetin dalmat. Duke qenë vetë këtu më bëri të kuptoj diçka të rëndësishme: Gjeografia ka shumë rëndësi.

Shoqëritë mund të jenë shumë dinamike, të zhvilluara ekonomikisht dhe të pasura për një periudhë kohe, por nëse janë në vendin e gabuar në Tokë, e humbasin këtë prosperitet. Por Shqipëria nuk është në vendin e gabuar në Tokë. Është një pikë shumë strategjike. Prandaj mendoj se është shumë e rëndësishme si për Bashkimin Evropian, ashtu edhe për shqiptarët, të kuptojnë se Shqipëria ka qenë për shekuj me radhë në zemër të një rajoni shumë të pasur dhe të zhvilluar. Pra, do të thosha se ka arsye të forta për të besuar se kjo mund të rikthehet dhe të rindërtohet gjatë viteve të ardhshme.

Duma: A do të vini përsëri këtu për të ndihmuar disa rrethe intelektuale, disa debate, disa, le të themi, qendra për një debat të avancuar intelektual, ashtu siç e keni në Holandë me një prestigj shumë të lartë? Ne jemi shumë të mësuar të diskutojmë “arsyet e dyta” të dikujt kur vjen në Shqipëri. Cila është arsyeja juaj kryesore për të ardhur këtu?

Albrecht: Arsyeja ime kryesore për të ardhur këtu është kurioziteti, të shoh një shoqëri me sytë e mi. Kam lexuar shumë për të, por mendoja se duhej ta shihja vetë. Vizitova Piramidën dhe isha shumë i impresionuar nga inkubatori dhe programi për të edukuar të rinjtë në teknologji dhe programim. Është një hapësirë e shkëlqyer. Mund të imagjinoja organizimin e debateve atje, ka dhoma diskutimi dhe një potencial të madh. Aktualisht, po e shqyrtojmë këtë mundësi me Rem Zilanin. Ai organizoi debatin dje dhe e bëri në mënyrë të shkëlqyer. Ishte një audiencë shumë interesante. Salla ishte plotësisht e mbushur. Mendoj se është e qartë që ka shumë mundësi në një qytet si Tirana për të diskutuar tema nga më të ndryshmet. Dhe ka shumë interes nga publiku.

Top Channel