Administrata Doganore Shqiptare ka përcaktuar rregulla të reja për procedurën e vlerësimit të automjeteve gjatë zhdoganimit, me një ndryshim të rëndësishëm që lidhet me mënyrën se si do të përcaktohet vlera e makinave të përdorura.
Manuali i ri, i bërë publik më 18 shtator 2026, parashikon që në rastet kur nuk mund të përdoret metoda e transaksionit, për përcaktimin e vlerës doganore të automjeteve do të përdoren edhe çmimet reale të publikuara online në burime dhe buletine të specializuara.
Rregullat e reja lidhen me automjetet e prodhuara gjatë 10 viteve të fundit dhe aktivizohen vetëm kur nuk plotësohen kushtet për vlerësimin e tyre sipas metodës së transaksionit dhe metodave të tjera të parashikuara në Kodin Doganor.
Një nga ndryshimet kryesore të manualit është përfshirja e kilometrave të përshkuara nga automjeti deri në momentin e zhdoganimit.
Pra, përveç të dhënave teknike që janë marrë në konsideratë edhe më parë, në vlerësimin e makinës do të merret parasysh edhe kilometrazhi.
Ky element synon të ndikojë në përcaktimin e një vlere më të përafërt me gjendjen reale të automjetit, pasi dy makina me të njëjtën markë, vit prodhimi, cilindratë dhe lloj karburanti mund të kenë vlera të ndryshme në varësi të kilometrave që kanë përshkuar.
Referimi te çmimet e publikuara në burime online nuk do të jetë metoda e parë e vlerësimit.
Sipas manualit, të dhënat nga këto burime do të përdoren vetëm kur nuk mund të zbatohen metodat e tjera të vlerësimit, sipas rendit të përcaktuar nga 1 deri në 5.
Në këto raste, Administrata Doganore do të marrë në konsideratë çmimet e publikuara në burime dhe buletine të specializuara, adresat e të cilave janë përcaktuar në manual.
Manuali i ri zbatohet për automjetet e prodhuara brenda 10 viteve të fundit.
Ndërkohë, Administrata Doganore sqaron se manuali nuk ndryshon mënyrën e vlerësimit të automjeteve më të vjetra, pra atyre të prodhuara më shumë se 10 vjet përpara vitit aktual.
Në praktikë, ndryshimi synon që në rastet kur nuk ka mundësi të përdoren metodat e tjera të vlerësimit, detyrimet doganore të përcaktohen duke marrë parasysh më shumë karakteristika të automjetit.
Kështu, për makina të së njëjtës kategori dhe me të njëjtën markë, vit prodhimi, cilindratë dhe lloj karburanti, vlera mund të diferencohet edhe në bazë të kilometrave të përshkuara.
Sipas Administratës Doganore, qëllimi është që vlera e përdorur për zhdoganim të pasqyrojë sa më saktë karakteristikat dhe gjendjen konkrete të automjetit në momentin e importit.
Administrata thekson gjithashtu se hyrja në fuqi e manualit të ri synon një vlerësim më të standardizuar dhe të mbështetur në të dhëna reale, ndërsa nuk parashikon ndryshim të mënyrës së vlerësimit për automjetet mbi 10 vjet të vjetra.
Top Channel
