Ish-kandidati i PD për deputet Arben Tafaj ndërroi jetë tragjikisht rreth orës 00:40, në Rrugën e Dajtit pasi aksidentalisht ka rënë nga 10 metra lartësi.
Sipas gazetares së Top Channel, Alma Demiraj, Arben Tafaj është paraqitur në urgjencën e spitalit të Traumës pa ndjenja dhe për shkak të plagëve nuk ia doli të mbijetonte.
“Më datë 03.12.2024, rreth orës 00:40, në Rrugën e Dajtit, dyshohet se duke qenë në gjendje të dehur, aksidentalisht është rrëzuar nga një lartësi rreth 10 metra, në banesën e tij, shtetasi A. T., 63 vjeç. Si pasojë e dëmtimeve të marra ky shtetas ka ndërruar jetë në spital”, sipas njoftimit të policisë.
Mjeku Ilir Alimehmeti ka reaguar në rrjete sociale në lidhje me ngjarjen e rëndë, ndërsa e kujton viktimën një qytetar elitar, një aktivist i vazhdueshëm dhe një politikan të spikatur me tone gjithnjë të moderuara qytetare.
“Me hidhërim të thellë u njoftova për ndarjen e papritur nga jeta të z. Arben Tafaj, i cili nuk ishte vetëm një mik, por edhe një qytetar elitar, një aktivist i vazhdueshëm dhe një politikan i spikatur me tone gjithnjë të moderuara qytetare.
Humbja e Benit është patjetër humbje e hidhur për familjarët dhe miqtë e tij, por është humbje e madhe edhe për qytetarët dhe qytetin e Tiranës!
Ngushëllime të ndjera familjes Tafaj për humbjen e një njeriu të dashur, të urtë e të matur.
Do të na mungosh Beni!”, shkruan Alimehmeti.
Kush ishte Arben Tafaj
I diplomuar në Fakultetin Ekonomik të Universitetit të Tiranës, Arben Tafaj ka kryer edhe një master shkencor për menaxhimin e pushtetit vendor.
Në periudhën 2003-2015 ai ka mbajtur postin e kryetarit të minibashkisë nr.8 në Tiranë, i zgjedhur nga votuesit e kryeqytetit në tre procese zgjedhore, ndërkohë që më pas ka mbajtur edhe postin e nënkryetarit të PAA-së si dhe kryetar i shoqatës “Tirana”.
Arben Tafaj është autor i një numri të konsiderueshëm artikujsh në shtypin e shkruar si dhe bashkëautori në vëllimet e Serisë Biografike të figurave të njohura të Tiranës me titull “Tirana personalitete”
Top Channel
