Pacolli zëvendëskryeministër

Këtë vendim e ka marrë kryeministri Hashim Thaçi, ndërsa Pacolli do të jetë i ngarkuar i veçantë për të siguruar njohje për shtetin e Kosovës si dhe për të sjellë investime të huaja.

Vendimi vjen vetëm pak kohë pasi vendin e Behgjet Pacollit në Presidencë e ka zënë Atifete Jahjaga dhe për pasojë marrëveshja ndërmjet Partisë Demokratike të Kosovës dhe Koalicionit për Kosovën e Re ka filluar të rishikohet.

Sipas marrëveshjes së mëhershme të lidhur ndërmjet Hashim Thaçit dhe Behgjet Pacollit, këtij të fundit i takonte posti i presidentit, të cilin tani e mban zonja Jahjaga, një kandidate konsensuale që e mori këtë post pas marrëveshjes ndërmjet tri partive, PDK-së, LDK-së dhe AKR-së.

“Pozita e presidentit të Republikës që ka qenë më herët marrëveshje e koalicionit, i ka takuar AKR-së, e cila nuk është në pozitë që t’i takojë asaj dhe do bëjmë një ballancim të ri që do të thotë një barazpeshë, brenda qeverisë”, deklaroi Hajredin Kuçi, zëvendëskryeministër i Kosovës.

Nga ana tjetër pavarësisht kritikave nga subjektet politike opozitare për marrëveshjen e re ndërmjet Thaçit, Mustafës dhe Pacollit, për kreun e qeverisë kosovare shtetet e rajonit duhet të marrin model Kosovën.

“Është një lajm që i ka munguar Kosovës, por edhe vendeve në rajon. Kjo është një model i mirë edhe për rajonin, sepse do ta zhvillojmë raportin pozitë-opozitë dhe do të punojmë bashkë për interesat e shtetit”, theksoi Thaçi.

Këtë deklaratë kryeministri Thaçi e bëri në mbledhjen e qeverisë që u mbajt vetëm pak kohë pasi që ai uroi presidenten Jahjaga për zgjedhjen në detyrën e re.

Top Channel