Një makinë e parkuar dyshohet se është shkaku i vrasjes me armë zjarri të 33-vjeçarit Valter Fierza, ngjarje e ndodhur mbrëmjen e kaluar në fshatin Hot i Ri në Shkodër.
Konflikti ka nisur mes vëllait të viktimës Kolë Fierza, dhe autorit të dyshuar të vrasjes. Debati nisi në një lokal afër banesave lidhur me parkimin duke pretenduar se është bllokuar rruga.
Rreth një orë pas këtij debati, konflikti ka vijuar mes viktimës Valter Fierza dhe autorit të dyshuar, Klodian Mhillaj. Pas debatit autori, që është edhe fqinj me 33-vjeçarin, ka marrë armën dhe e ka qëlluar duke e lënë të vdekur në vend.
Policia ka identifikuar dhe shpallur në kërkim autorin 24-vjeçar si dhe tre persona të tjerë të dyshuar si të përfshirë në ngjarje.
Mesditën e sotme policia ka arritur të arrestojë njërin nga të rinjtë e përfshirë në vrasjen e ndodhur mbrëmjen e kaluar. I arrestuari është vëllai i autorit,Pal Mhillaj, 22 vjeç, i cili dyshohet se ka bashkëpunuar për vrasjen. Në konfliktin me vëllezërit Fjerza, janë të përfshirë edhe pjesëtarë të familjes Mhillaj. Dyshohet se autori i vrasjes, pas ngjarjes është arratisur drejt Dukagjinit.
Të përfshirë në ngjarje janë Klodian Mhillaj, 24 vjeç, A. M., 23 vjeç, P. M., 22 vjeç dhe L. M., 20 vjeç, të gjithë banues në fshatin Hot i Ri, si dhe shtetasi E. D., 38 vjeç, banues në lagjen “Vojo Kushi”.
Policia gjeti dhe sekuestroi me cilësinë e provës materiale, një armë zjarri pistoletë (dyshohet në posedim të shtetasit K. M.) dhe 3 gëzhoja që u gjetën në vendngjarje.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
Top Channel
