Një qytetar nga qyteti i Fierit i cili vuan nga një problem shëndetësor ku dyshohet për tumor, i sugjerohet nga spitali Memorial i Fierit të bëj rezonancën magnetike në qytetin e Vlorës.
Në datën 26 janar kryen rezonancën dhe i japin vetëm diskun pa një përgjigje të shkruar. I thonë t’i drejtohet spitalit Memorial në Fier pasi ia lexojnë ata diskun.
Muharrem Bizaj 68 vjeç pensionist nga Fieri, pasi bëri rezonancën në Vlorë shkon sërish në spitalin Memorial për t’i shkruajtur diagnozën. Mjekët e këtij spitali e kthejnë mbrapsht duke i ‘larë duart’ se diskun duhet të lexohet atje ku kryhet, pra në Vlorë.
68-vjeçari merr sërish rrugën drejt Vlorës ku merr po të njëjtën përgjigje, “duhet ta lexoj Fieri se atje janë 4 mjekë imazhineristë, unë jam vetëm një” e përcjell mjekja e cila i bëri rezonancën me kontrast në Vlorë. Dhe kjo sorollatje e tij zgjat plot tri herë, Fier- Vlorë e anasjelltas. Përgjigje nuk merr në asnjë rast.
Në datën 9 shkurt Muharrem Bizaj kërkon ndihmën e Fiksit duke shprehur hallin e tij, pasi dyshohej për një masë tumoriale. Ai i drejtohet spitalit Memorial Fier që çuditërisht shumë të sjellshëm i marrin diskun dhe i thonë që do ta telefononin ata , pas marrjes po nga ata të përgjigjes së mjekes së Vlorës.
Pas 4-5 ditësh kontaktohet nga spitali Memorial i Fierit dhe i komunikohet se duhet të shkojë sërish në Vlorë, pasi mjekja e Vlorës nuk ka dhënë një përgjigje të saktë të rezonancës, nuk kishte përcaktuar asgjë. Pra nesë pacienti kishte apo jo një masë dhe nesë po ça mase ishte dhe çfarë përmasash kishte.
Këtë përgjigje mjekët e Memorialit ia dhanë pacientit pa firmë mjeku. Me të drejtë 68 vjeçari ngre pyetjen që edhe pse ka gati dy muaj që ka bërë rezonancën ende nuk di nga se vuan dhe si do vijojë sëmundja e tij.
Për të 4-ën herë pasi ishte ankuar në Fiks Fare, 68 vjeçari rimerr rrrugën drejt Vlorës. Aty i kërkon mjekes se përgjigja që ajo i ka dërguar Fierit është e pasaktë, por mjekja e largon përgjegjësinë nga vetja duke i thënë se përcaktimin duhet ta kishin bërë mjekët në Fier pasi ata janë 4 imazhineristë dhe ajo ishte e vetme.
Gjithsesi më në fund mjekja lexon diskun e rezonancës duke i plotësuar një tjetër përgjigje pacientit. Me këtë përgjigje z. Muharrem i drejtohet spitalit Memorialit në Fier ku i thonë që tashmë përgjigja është e saktë. Pyetjes se pse u sorollat kaq shumë pacienti, mjekët vonesën ia faturuar mjekes së Vlorës. ” Ajo duhet të shoqërojë diskun me përgjigjen sepse ne kemi sisteme të tjera dhe nuk e lexojmë dot” thotë njëri prej mjekëve.
Kurse mjeku turk i cili i bëri konsultën 68 vjeçarit, pasi e rekomandon tek mjekja endokrinologe ku duhet të përcaktoj edhe një operacion i cili kryhet vetëm në Tiranë, e pyet se pse mjekja e Vlorës i kishte dhënë përgjigje të gabuar herën e parë.
Takimin me mjeken endokrinologe u caktua në datën 6 mars. Dhe më në fund kalvari i pacientit përfundoi.
Top Channel
