Një zjarr i madh ka përfshirë prej dy ditësh malin në fshatin Sojnik të Gramshit.
Deri tani janë djegur më shumë se 10 hektarë pyje me pisha. Zjarri ndodhet larg zonave të banuara, por dëmi në pyll është i konsiderueshëm.
Për fikjen e zjarrit janë angazhuar rreth 100 persona, punonjës të zjarrfikëses, Bashkisë Gramsh dhe banorë të fshatrave rrotull.
Në lidhje me këtë vatër dyshohet se autor i zjarrvënies është një 57-vjeçar i cili është vënë nën hetim.
“Dogji me zjarr një sipërfaqe të madhe pyjore, procedohet penalisht 57-vjeçari. Në vijim të punës hetimore për identifikimin dhe vënien përpara përgjegjësisë ligjore të autorëve të zjarrvënieve të qëllimshme, specialistët për Hetimin e Krimeve në Komisariatin e Policisë Gramsh referuan materialet në Prokurori dhe nisi procedimi penal për shtetasin F. H., 57 vjeç, banues në fshatin Mukaj, Gramsh, pasi dyshohet se ka ndezur zjarr, në fshatin Sojnik, Gramsh, dhe si pasojë e përhapjes së flakëve është djegur një sipërfaqe e konsiderueshme pyjore.
Materialet i kaluan Prokurorisë, për veprime të mëtejshme. Drejtoria Vendore e Policisë Elbasan apelon për të gjithë banorët, që për asnjë arsye të mos ndezin zjarre, pasi do të përballen me ligjin, si dhe fton qytetarët që të denoncojnë në numrin 112 dhe në Komisariatin Dixhital, çdo rast të zjarrvënies apo të paligjshmërisë në tërësi, duke iu garantuar anonimat të plotë dhe reagim të shpejtë e të paanshëm”, sipas policisë.
Top Channel
