Një lajm i mirë është dhënë sot nga mediat gjermane për ribashkimin e një familjeje shqiptare që u nda gjatë përmbytjes katastrofike në Gjermani.
Babai shqiptar Shefik Hyseni, 46 vjeç arriti të shtrëngojë në krahë vajzat e tij, Lauretën dhe Altunën, të cilat u shpëtuan me helikopter.
Hyseni nuk e dinte me orë të tëra nëse i kishte humbur vajzat e tij në përmbytje. Babai pati frikë për jetën e Lauretës 13 vjeç dhe Altunës 17 vjeç.
“Të mërkurën në mbrëmje vajzat e mia më telefonuan dhe më thanë se uji kishte hyrë tashmë në katin e parë!” tha për BILD 46-vjeçari që vrapoi menjëherë në shtëpi.
“Hera e fundit që fola me to ishte rreth orës 21:00. Pastaj lidhja u ndërpre”, shtoi ai.
Krejt i dëshpëruar, ai priti gjithë natën në një urë nga e cila mund të shihte shtëpinë e tij. Por dje në orën 5.30 pasdite i erdhi lajmi që e lumturoi.
Fëmijët e tij ishin shpëtuar nga shtëpia e përmbytur me helikopter.
“Ne vetëm kemi qarë në krahët e njëri –tjetrit. Tani duhet vetëm të shohim se çfarë ka mbetur nga shtëpia jonë”, tha ai.
Top Channel
