Elseid Hysaj vazhdon të jetë në qendër të interesimit të disa klubeve, teksa e ardhmja e mbrojtësit shqiptar mbetet ende për t’u vendosur.
Pas interesimit të Lecce, që kishte bërë një ofertë për të në fillim të merkatos, në garë është futur edhe Ascoli. Klubi nga Marche ka paraqitur tashmë një propozim konkret për Hysajn, por oferta e parë është refuzuar nga futbollisti për arsye ekonomike.
Megjithatë, sipas raportimeve të fundit, dera nuk është mbyllur. Hysaj mbetet i hapur për një transferim te Ascoli, ndërsa drejtuesit e klubit italian po punojnë me enturazhin e tij për të gjetur një marrëveshje që mund ta bindë mbrojtësin shqiptar.
Ascoli e konsideron Hysajn një profil të rëndësishëm për krahun e djathtë. Pas dështimit të tratativave për Hans Hateboer, klubi ka kthyer vëmendjen te shqiptari, i cili ofron edhe një avantazh të rëndësishëm për shkak të eksperiencës dhe versatilitetit të tij, pasi gjatë karrierës ka luajtur si në krahun e djathtë, ashtu edhe në të majtin. Për Hysajn, megjithatë, konkurrenca nuk mungon. Përveç Ascolit dhe Lecce-s, interes për mbrojtësin shqiptar ka edhe nga disa klube jashtë Italisë.
Hysaj, 32 vjeç, është një nga lojtarët me më shumë eksperiencë të Kombëtares shqiptare. Ai numëron 99 ndeshje dhe 2 gola me fanellën kuqezi, ndërsa vlera e tij aktuale në Transfermarkt llogaritet në rreth 1.2 milionë euro. Tashmë mbetet për t’u parë nëse Ascoli do të rikthehet me një ofertë të re dhe nëse kushtet ekonomike do të mjaftojnë për ta bindur Hysajn të nisë një tjetër aventurë në futbollin italian.
Top Channel
