Përveç Bashkim Dedjes, Fatos Lulos dhe Shkëlzen Selimit, për të cilët është vendosur sekuestrim i pasurive të tyre, nën procedurë hetimore janë edhe shtatë ish gjyqtarë të tjerë kushtetues dhe të Gjykatës së Lartë.
Burime për Top Channel pranë SPAK tregojnë se në vijim të hetimeve secrete është caktuar një ekspert kontabël që po llogarit edhe një herë pasuritë e të dyshuarve për veprimtare të paligjshme si dhe gjetjet e komisionit të pavarur të kualifikimit dhe menjëherë sapo ekspertiza të përfundojë, SPAK do ti drejtohet me kërkesë gjykatës antikorrupsion.
Pesë nga këta gjyqtarë i përkasin Gjykatës së Lartë prej të cilës u larguan nëpërmjet verdikteve të vettingut. Në krye të listës qëndron Artan Zeneli ish gjyqtarë i lartë i shkarkuar nga detyra në 2018 për problem me pasuritë të cilat ai nuk i justifikoi dot para KPK, por për të cilat ja hodhi fajin harresës njerëzore.
Apartamentet e shumta, toka e privatizuar dhe shitja e një trualli në Velipojë po kontrollohen nga SPAK, ndërsa SPAK bën me dije se ka administruar edhe deklaratat e Artan Zenelit pranë ILDKPI.
Ndaj Artan Zenelit, KPK zbuloi se ai gjithashtu nuk kishte deklaruar revokimin e vizës amerikane. Të tjerë ish gjyqtarë që po ju dyshohen pasuritë, si edhe Artan Zeneli, si të ardhura nga aktiviteti i paligjshëm janë Guxim Zenelaj, Edmond Islamaj, Tom Ndreca, Gani Dizdari dhe Admir Thanza bënë me dije burimet e SPAK.
Më herët SPAK urdhëroi sekuestrim të pasurive të tre ish gjyqtarëve të rëndësishëm, një kërkesë e cila u pranua pa asnjë diskutim nga Gjykata.
Top Channel
