Koronavirusi dëmton rëndë ekonomitë e SHBA-së dhe Gjermanisë
15/05/2020 18:01
Ministrat e G7-ës takohen në Itali për të diskutuar për konfliktet 25/11 09:40
Shitjet me pakicë në Shtetet e Bashkuara ranë për 16.4 për qind në muajin prill, tregojnë të dhënat e qeverisë.
Kjo është rënia më e madhe që nga fillimi i regjistrimeve në vitin 1992. Ajo pothuajse është dyfishuar në krahasim me rënien e muajit mars prej 8.3%.
Situata është pasojë e mbylljes së shumë bizneseve, për shkak të pandemisë së koronavirusit. Shumë ndërmarrje aplikuan për mbrojtje nga falimentimi.
Të tjerë shitës me pakicë, pritet të ndërmarrin hapa të ngjashëm. Të dhënat vijnë në kohën e një niveli të paparë të humbjeve të vendeve të punës në SHBA.
Rreth 36.5 milionë amerikanë janë regjistruar si të papunë gjatë tetë javëve të fundit.
Të premten, edhe Gjermania – ekonomia më e madhe në Evropë – njoftoi se është zhytur në recesion, pasi pësoi tkurrjen më të madhe tremujore që nga kriza financiare e vitit 2008.
Të dhënat zyrtare atje treguan se ekonomia është tkurrur për 2.2. për qind në tre muajt e parë të vitit 2020.
Edhe Gjermania ka mbyllur dyqane dhe biznese, si masë për frenimin e përhapjes së koronavirusit.
Top Channel
