Turqia “vë bast” te Trump për avionët F-35/ Ankaraja paguan 2.4 milionë dollarë për lobim në SHBA

Turqia po intensifikon përpjekjet për t’u rikthyer në programin e avionëve luftarakë F-35, duke angazhuar një firmë të fuqishme lobimi në Uashington me lidhje të afërta me Presidentin Donald Trump.

Ministria Turke e Mbrojtjes Kombëtare ka nënshkruar një kontratë njëvjeçare me vlerë 2.4 milionë dollarë me kompaninë Ballard Partners, sipas dokumenteve të depozituara në Departamentin e Drejtësisë të SHBA-së.

Marrëveshja, e firmosur më 8 gusht, parashikon pagesën e 200 mijë dollarëve në muaj për shërbime të marrëdhënieve me qeverinë amerikane, këshillim strategjik dhe përfaqësim të interesave të Ankarasë përballë institucioneve federale.

Firma do të ketë gjithashtu detyrën të informojë qeverinë turke mbi zhvillimet në Kongresin amerikan dhe politikën e SHBA-së, në një përpjekje për të krijuar kushtet e nevojshme për rikthimin e Turqisë në programin F-35.

Ballard Partners drejtohet nga Brian Ballard, një republikan i njohur nga Florida dhe mbështetës i Trump, i cili ka punuar edhe në fushatat e presidentit amerikan.

Kompania ka një histori bashkëpunimi me Ankaranë. Në vitin 2017, gjatë mandatit të parë të Trump, Turqia e kishte angazhuar Ballard Partners me një kontratë prej 1.5 milionë dollarësh.

Firma ka forcuar ndjeshëm aktivitetin e saj në Uashington. Vetëm gjatë tremujorit të parë të vitit 2026, të ardhurat e saj nga aktiviteti federal i lobimit kaluan 30 milionë dollarë.

Mes personave që kanë punuar me kompaninë janë edhe Susan Wiles, shefja aktuale e stafit të Shtëpisë së Bardhë, dhe Pam Bondi, ish-prokurorja e Përgjithshme e SHBA-së.

Ekipi që po merret me çështjen e Turqisë përfshin gjithashtu ish-kongresmenin demokrat Robert Wexler dhe Thomas Bundry, i cili ka shërbyer si ndihmës special i Trump dhe drejtor i lartë për çështjet legjislative në Këshillin e Sigurisë Kombëtare.

Ankaraja u përjashtua nga programi amerikan F-35 në vitin 2019, pasi Turqia bleu sistemin rus të mbrojtjes ajrore S-400.

Uashingtoni argumentoi se përdorimi i sistemit rus përbënte rrezik për sigurinë e teknologjisë së avancuar të avionëve amerikanë.

Pavarësisht përjashtimit, Turqia ka vazhduar të kërkojë rikthimin në program. Ankaraja pretendon gjithashtu se gjashtë avionë F-35 të ndërtuar për të janë ende të ruajtur në Shtetet e Bashkuara.

Për të hapur rrugën drejt rikthimit, janë diskutuar skenarë të ndryshëm, përfshirë mundësinë që Turqia të heqë dorë nga sistemet S-400 ose t’i transferojë ato te një vend i tretë.

Kontrata e re me Ballard Partners tregon se Ankaraja po përpiqet të përdorë edhe kanalet e lobimit në Uashington për të bindur Kongresin dhe administratën amerikane për rikthimin e saj në programin F-35.

Top Channel