UEFA nuk ka mbaruar punë me Infantinon, kërcënon presidentin e FIFA-s se do e padisë për planin e shitjes së Botërorin

Sipas mediave britanike, UEFA i ka dërguar një letër zyrtare Infantinos, ku e paralajmëron se po vlerëson ngritjen e një padie, arbitrazhi ose ankese rregullatore lidhur me planin tashmë të braktisur për shitjen e një pjese të të drejtave tregtare të Kupës së Botës tek investitorë privatë.

Plani i Infantinos shkaktoi reagime të forta në botën e futbollit, pasi parashikonte shitjen e aksioneve të turneut më të madh të futbollit përmes një strukture të re financiare. Pas presionit të madh nga UEFA, konfederatat e tjera dhe sponsorët, FIFA u detyrua të tërhiqej nga projekti.

Në letrën e saj, UEFA kërkon që FIFA dhe Infantino të ruajnë të gjitha dokumentet dhe të dhënat elektronike që lidhen me projektin, duke paralajmëruar se shkatërrimi ose fshirja e provave mund të sjellë pasoja ligjore.

“UEFA po shqyrton në mënyrë aktive ndërmarrjen e veprimeve ligjore, arbitrazhit dhe ankesave rregullatore në lidhje me planin e propozuar nga FIFA”, thuhet në dokument.

Përveç FIFA-s dhe Infantinos, në procedurat e mundshme ligjore mund të përfshihen edhe investitorë dhe institucione financiare që ishin pjesë e projektit, mes tyre miliarderi Joshua Kushner, Greg Maffei, JP Morgan dhe OpenEconomics.

UEFA u ka kërkuar gjithashtu këtyre palëve të mos fshijnë apo shkatërrojnë asnjë material që lidhet me projektin e dështuar.

Marrëdhëniet mes presidentit të UEFA-s, Aleksander Ceferin, dhe Gianni Infantinos janë tensionuar prej kohësh, ndërsa kjo çështje ka thelluar edhe më shumë konfliktin mes dy institucioneve.

Sipas raportimeve, UEFA kishte paralajmëruar se federatat e saj mund të bojkotonin Kupën e Botës nëse projekti do të miratohej.

Megjithëse FIFA ka hequr dorë nga plani, UEFA nuk e ka përjashtuar mundësinë e ndjekjes së rrugës ligjore, ndërsa i ka dhënë Infantinos pesë ditë pune për të konfirmuar se do të ruajë të gjitha provat dhe dokumentet që lidhen me këtë çështje.

Top Channel