Federata Braziliane e Futbollit (CBF) është vënë në qendër të kritikave të ashpra nga tifozët, pasi publikoi një video motivuese një javë pas eliminimit të Brazilit nga Kupa e Botës 2026.
“Seleção” u eliminua në fazën e 1/8-ave pas humbjes 2-1 ndaj Norvegjisë, ndërsa CBF tentoi të transmetonte një mesazh optimizmi për të ardhmen. Në videon e publikuar në rrjetin social X, federata premtoi rikthim më të fortë në Botërorin e ardhshëm.
“Pas katër vitesh, përgatituni, sepse do të jemi edhe më të fortë, duke synuar yllin e gjashtë”, thuhej në mesazhin e videos.
Postimi shoqërohej edhe me mbishkrimin: “Një film që nuk donim ta shkruanim, për një histori që nuk mund të harrohet. Mund ta besoni.”
Um filme que não queríamos escrever, sobre uma história que não pode ser esquecida.
Pode acreditar.
Que venha o novo ciclo. pic.twitter.com/txkIOHZiXV— brasil (@CBF_Futebol) July 12, 2026
Megjithatë, reagimi i tifozëve ishte krejtësisht i kundërt nga ai që priste federata. Seksioni i komenteve u mbush me kritika të forta ndaj drejtuesve të futbollit brazilian, të cilët shumë tifozë i akuzuan për mungesë përgjegjësie dhe përqendrim te marketingu, në vend të rezultateve në fushë.
“Shkoni në djall. Është vetëm marketing dhe retorikë boshe”, shkroi një prej përdoruesve.
Një tjetër komentues u shpreh edhe më ashpër, duke fajësuar drejtpërdrejt drejtuesit e federatës për rënien e futbollit brazilian dhe duke theksuar se suksesi do të rikthehet vetëm kur interesat e futbollit të vendosen mbi ato personale.
Përveç eliminimit, shumë tifozë ngritën shqetësime edhe për çmimet e larta të biletave, duke i konsideruar ato si një tjetër tregues të shkëputjes së federatës nga mbështetësit e saj.
Reagimet në rrjetet sociale tregojnë se pakënaqësia ndaj CBF-së shkon përtej eliminimit nga Botërori, duke reflektuar një krizë besimi mes tifozëve dhe institucioneve që drejtojnë futbollin brazilian.
Top Channel
