Një shqiptar ka mbetur i vdekur pas një sherri banal në lagjen Nea Jonia të Athinës.
Sipas policisë greke, gjithçka nisi pas një konflikti rreth orës 23:40 që disa klientë shqiptarë patën mes njëri-tjetrit në ambientet e një lokali.
Shumë shpejt sherri degjeneroi në përplasje fizike, e në vazhdim njëri prej tyre nxori një pistoletë që mbante me vete dhe qëlloi me armë ndaj grupit kundërshtar.
Plumbat plagosën një prej klientëve që ndodhej në lokal, i cili nuk kishte asnjë lidhje me ngjarjen. 37-vjeçari që u identifikua si Pëllumb Islami, nga Delvina, por thirrej nga të gjithë me emrin Sandri, u dërgua në spitalin KAT me plagë në gjoks dhe shpatull, por mjekët nuk mundën ta shpëtonin.
Sipas informacioneve, ai ushtronte profesionin e hidraulikut në vendin fqinj.
Policia e cila mbërriti në vend ngjarje brenda pak minutash, tha se autorët mundën të largoheshin me një automjet të markës “Mercedes”, por nuk u bë i mundur ndalimi i tyre.
Në vend u gjetën shtatë gëzhoja dhe një plumb i deformuar, të cilat u dërguan për ekzaminim. Ende nuk dihen shkaqet e sherrit, por dyshohet për larje hesapesh mes bandave.
“Dola jashtë, ishte kaos, e pashë të plagosurin të rënë. Një makinë është larguar me shpejtësi dhe i kanë bërtitur shoferit “ik, ik””, tha për mediat greke një banor i zonës.
Top Channel
