Revanshi i shumëpërfolur Mayweather-McGregor, Dana White “i vë vulën”

27/07/2022 18:09

Ditët e fundit ka pasur thashetheme për një tjetër duel mes Floyd Mayweather dhe Conor McGregor, madje është raportuar se marrëveshja ishte “shumë afër”, por Dana White, president i UFC-së, qartëson gjithçka. I intervistuar nga TMZ Sports, në lidhje me një raportin nga Britania e Madhe se të dy luftëtarët do të kenë një revansh, 53-vjeçari deklaroi:

“Është marrëzi e plotë! Ajo histori erdhi nga një gazetë e quajtur “Daily Mirror”, një tabloid në Evropë. Është absurditet total”.

Presidenti i UFC thotë se lufta nuk do të ketë asnjë revansh.

“Conor McGregor është nën kontratë me UFC-në, kështu që, nëse dëshiron të veshë dorezat e boksit për t’u përballur me “Money”, duhet të përfshihet edhe kreu i UFC-së.”

Për White, i cili shkon mirë me Mayweather, nuk ka asnjë shans që kjo të ndodhë, të paktën jo në një të ardhme të afërt.

Si përfundoi dueli i parë?

Në gusht 2017, irlandezi dhe amerikani boksuan në “T-Mobile Arena” në Las Vegas, në atë që ishte një nga betejat më të përfolura në historinë e sporteve luftarake.

Ndeshja u fitua nga një TKO në raundin e 10-të nga Mayweather, i cili deri në atë pikë kishte një rekord prej 49 fitoresh dhe 0 humbje në ring.

Duhet theksuar se ishte hera e parë që McGregor luftonte si boksier profesionist. Pas asaj fitoreje, “Money” i dha lamtumirën boksit profesionist, ndonëse ka pasur përballje ekzibicioni, si ajo kundër Logan Paul.

Ndërkohë, “The Notorious” vazhdon të rikuperohet nga dëmtimi i pësuar verën e kaluar në përballjen me Dustin Poirier, ku theu këmbën.

Top Channel