Policia e Elbasanit ka vënë në pranga një person, si dhe ka shpallur në kërkim bashkëpunëtorin e tij, pasi është kapur duke transportuar emigrantë të paligjshëm drejtë vendeve të BE-së, kundrejt pagesës.
Policia njofton se në pranga ka rënë shtetasi F. Z., 29 vjeç, banues në Durrës.
29-vjeçari është kapur në vendin e quajtur “Kryqëzimi i Besmirit”, duke transportuar me automjetin tip “BMW”, 3 emigrantë të paligjshëm, të cilëve iu kishte premtuar kalimin drejt vendeve të BE-së, kundrejt pagesës.
“Në momentin kur shërbimet e Policisë i kanë bërë shenjë ndalimi, ky shtetas nuk i është bindur urdhrit të punonjësit të Policisë, por ka tentuar të largohet.
Gjithashtu dhe është shpallur në kërkim bashkëpunëtori i tij, shtetasi P. S., 30 vjeç, banues në Kamzë, Tiranë, i cili paraprinte rrugën me një mjet tjetër, për të kontrolluar nëse kishte shërbime policore në rrugë.
Në cilësinë e provës materiale janë sekuestruar 2 automjetet, 1 aparat celular dhe 460 euro të dyshuara të përfituara nga ky aktivitet i paligjshëm”, njofton policia.
Materialet i kaluan Prokurorisë, për veprime të mëtejshme procedurale, për veprat penale “Ndihma për kalim të paligjshëm të kufijve” dhe “Mosbindja ndaj urdhrit të punonjësit të policisë së rendit publik”.
Top Channel
